De novo as rúas, prazas e xardíns redondeláns servirán de escenario para artistas, músicos e titiriteiros das máis variadas procedencias. A organización do evento, compartida pola ASOCIACIÓN XENTE TITIRITEIRA e a Concellería de Cultura do Concello de Redondela, mantén a vocación internacional do FESTIVAL, presentando, nesta ocasión, os traballos e espectáculos de compañías profesionais do Reino Unido, Bulgaria, Dinamarca, Murcia, Cantabria, Madrid Cataluña e Galicia (entre outras). Unha festa da diversidade que encherá de novo Redondela de marionetas de fíos, monicreques tradicionais, vangardas creativas, xogos participativos, animación de rúa e unha chea de sorpresas. Seguindo a filosofía do seu creador, Juanjo Amoedo, o FESTIVAL continúa na liña de involucrar na súa celebración a maior cantidade posible de institucións, de sectores sociais e de xentes da vila, para manter este acontecemento como a maior manifestación cultural de Redondela. Así, o FESTIVAL conta xa co apoio de diversas institucións políticas, económicas e sociais de índole estatal, autonómica, provincial e local, e na súa organización participan, de xeito voluntario, arredor de 50 persoas procedentes de diferentes colectivos e agrupacións locais que conforman a ASOCIACIÓN XENTE TITIRITEIRA. Na pasada edición de 2011 superouse sobradamente a cantidade de 30.000 espectadores nas diferentes seccións da programación, polo que as previsións para este ano son inmellorables e agárdanse arredor de 35.000 asistentes.
O FESTIVAL INTERNACIONAL DE TÍTERES DE REDONDELA é unha festa internacional onde se mesturan títeres, ledicia e festa.

SOBRE A PROGRAMACIÓN

A programación deste XIII FESTIVAL INTERNACIONAL DE TÍTERES DE REDONDELA, MEMORIAL JUANJOAMOEDO 2012, é dun alto nivel artístico, logo dunha selección de máis de 580 propostas de todo o mundo.

NOVIDADES DA PROGRAMACIÓN DE 2012

17 DE MAIO. DÍA DAS LETRAS GALEGAS

Este ano o Festival coincide co Día das Letras Galegas, o 17 de maio , polo tanto co día máis importante do ano para a cultura galega. Fundir o Festival Internacional de Títeres co Día das Letras Galegas é toda unha homenaxe festiva ás nosas letras e ao teatro. Ademais acolleremos a Exposición "Os Monicreques da Escola", onde os nenos e as nenas da comarca van construír e expor as súas propias marionetas.

TEATRO ÍNTIMO

Unha das novidades para este ano é a programación de obras, que pola súa posta en escena necesitan duna intimidade especial e un traballo co espazo. Así cun aforo limitado a 120 localidades as compañías Onírica Mecánica (Murcia)e Sofie Krong (Dinamarca) ofrecerán os seus espectáculos nunhas condicións idóneas. Para compensar o límite do aforo estes espectáculos farán dobre programación.

EIXOS DA PROGRAMACIÓN

CAMPAÑA ESCOLAR

Máis de 2500 escolares entre 4 e 12 anos pasarán polo Teatro para poder gozar das 8 representacións que hai exclusivamente para colexios.

TEATRO DE RÚA

Encher as rúas e prazas é un dos obxectivos do Festival. Son máis de 20 espectáculos para todos os públicos, en diferentes puntos e con diferentes estilos. Pasarrúas, monicreques tradicionais, novas tendencias... todo un mosaico teatral para gozar toda a xente.

TÍTERES DE SALA PARA ADULTOS

O Festival tamén fai un esforzo por coidar a programación de sala , creando nas últimas edicións un público desexoso de ver bos espectáculos de monicreques destinados a adultos.

*********************

EXPOSICIÓN “Os Monicreques da escola”
Lugar : Multiusos da Xunqueira e varias rúas e prazas da vila.
Nenas e nenos da comarca expoñen os seus Títeres.

 

13 FESTIVAL

Menorial, Juanjo Amoedo